Tulo patay sa bangga sa motor vs. bus

CEBU, Philippines - Tulo ang patay ug usa ang talandugon ang kahimtang human magkabangga ang usa ka motorsiklo ug minibus sa highway sa barangay Sangat sa lungsod sa San Fernando niadtong Domingo sa alas 9:30 sa gabii.

Ang mga biktima mao ang drayber sa motorsiklo nga Honda TMX-155 nga si Martino Nuyab, 21,taga Mambaling siyudad sa Sugbo ug mga angkas niini nga sila si Tatoy Dionisio, taga barangay Balungag San Fernando ug Vercele Bacalso, nagpuyo gihapon sa maong lugar nga kagahapon lang sa alas 4:30 sa kaadlawon gideklarar nga namatay samtang giatiman sa mga doktor sa South General Hospital sa Naga.

Samtang pabiling talandugon ang kahimtang ni Fidel Macaspac Labrado, 28, molupyo gihapon sa maong dapit.

Samtang ang drayber sa mini bus nga si Leonardo Reyes, 45, kasamtangang gitanggong sa kapolisan.

Matud pa ni SPO1 Francisco Salubre, desk officer sa San Fernando Police Station dihang nahinabi sa Banat News gikan sa siyudad sa Sugbo paingon sa Carcar ang minibus samtang ang motorsiklo sa mga biktima gikan sa Carcar ug paingon sa San Fernando.

Subay sa mga pamahayag sa mga testigo, ang kapolisan mibutyag nga kusog ang dagan sa motorsiklo ug mikawat sa pikas linya apan naatol nga maoy pag-agi sa maong minibus maong nagkabanggaay.

Tungod sa kakusog sa impact nalabay ang mga biktima ug patay diha-diha ang drayber nga si Nuyab ug angkas nga si Tatoy.

Samtang ang laing duha ka angkas nga grabe ang kadaut sa lawas nga nahiaguman gihatud dayon sa South General Hospital diin namatay si Bacalso. - (BANAT NEWS)