Guizo Elementary School tak-upan sa Hunyo

CEBU, Philippines - Hingpit na nga tak-upan sa pagbukas sa klase karong Hunyo niining tuiga ang Guizo Elementary School ug ang mga tinun-an adto na mosulod sa ilang klase sa giandam nga mga lawak sa Mandaue City Central School sa barangay Centro sa maong dakbayan.

Si Mayor Jonas Cortes miingon nga dili ipagamit ang tulunghaan sa barangay Guizo sanglit gitinguha pa niya nga paabunohan ang maong tulunghaan aron dili na kini mabahaan sa higayon nga kusog ang pagbunok sa ulan.

Matud pa ni Cortes nga adunay mga bakanteng lawak ang Mandaue City Central School nga magamit sa mga tinun-an sa Guizo nunot usab sa hingpit na niyang pagpatak-op niini.

Nasuta sa mayor nga ang nahimutangan sa Guizo Elemenary School usa ka lupa nga lugar hinungdan nga masanapan kini sa tubig.

Si Cortes miingon nga si Gobernador Gwendolyn Garcia maoy mopatukod og mga bag-ong building alang sa maong tulunghaan ug tukma kaayo ang maong kahigayonan sa pagsulbad sa suliran sa pagbaha sa maong dapit sa panahon nga kusog ang ulan.

Gitataw ni Cortes nga iyang gipangayo ang pagsabot sa mga ginikanan nga adto lamang una mosulod sa ilang klase ang ilang kabataan sa City Central School sa sunod tuig nga tingtungha sanglit ang tumong niini mao man usab ang hingpit nga pagsulbad sa maong suliran. (BANAT NEWS)