Talisay nagtinguhang masulod sa Hall of Fame

CEBU, Philippines - Ang dakbayan sa Talisay gilaumang mamahimong ‘hall of fame’ isip Most Gender Responsive nga Local Government Unit (LGU) sa tibuok rehiyon kini butyag ni PO1 Violeta Godines sa Talisay City Police Station Women and Children’s Protection Desk.

Si Godines nagkanayon nga ang criteria o sumbanan sa kompetisyon mao ang kabahin sa pag-atiman sa mga panginahanglanon sa komunidad ug ang pasilidad sa City Social Welfare alang sa mga bata, pansayan alang sa kababayen-an ug playground alang usab sa kabataan ug youth home.

Sa milabay’ng duha ka tuig ang Talisay mao ang napiling Most Gender Responsive LGU ug gilaumang sa ikatulo ka higayon makadaog na usab kini.

Niadtong milabay’ng adlaw ang grupo sa Provincial Women’s Commission misuroy sa dakbayan sa Talisay aron sa pagsusi sa ilang mga pasilidad.

Matud usab ni Godines nga alang sa tuig 2010 ang ulahi karong kompetisyon ug nakasumitir na sila og mga dokumento isip kabahin sa mga rekisitos.

Karong buwan sa Marso atol sa Women’s Month ipahigayon ang awarding diha sa Cebu International Convention Center. Ang Talisay sa talaan sa Women and Children’s Protection Desk dunay 32 ka kaso sa pang-abuso sa kababayen-an.

Sa maong gidaghanon 13 ka mga batang babaye ang nabiktima sa sexual abuse ug unom sa physical abuse ug ang 13 mga hingkod na nga kababayen-an nga nabiktima sa pang-abuso nga naglakip sa pagpangulata sa ilang mga bana. (BANAT NEWS)