Tulo ka ex-PAF gikan sa Afghanistan miabot na

CEBU, Philippines - Human sa upat ka bulan nga pagpaabot sa pamilya sa tulo ka mga kanhi sakop sa Philippine Air Force nga nahagsa sa nasud sa Afghanistan nabalik na sa ilang tagsatagsa ka pamilya sa Mactan Benito Ebuen Air Base sa dakbayan sa Lapulapu.

Dako ang pasalamat ni Nela Padura ang biyuda sa namatay nga si Lt. Eduardo Padura sa dihang miabot ang patay’ng lawas sa iyang bana sa milabay’ng adlaw.

Ang patay’ng lawas nila ni Lt. Eduardo Padura, 2lt. Bernardo Castillo ug Tsgt. Wilo Elbanbuena mga kanhing sakop sa 220 Air Lift Wing sa PAF nga nagbase sa Mactan Benito Ebuen Air Base sa dakbayan sa Lapulapu.

Sa sayo pa niini giangkon sa banay’ng Padura nga ila nang nadawat ang nahitabo sa ilang padre de pamilya.

Ang mga biktima nga lisod nang ilhon tungod sa grabeng kadaut sa nahiaguman sa ilang kalawasan nailhan pinaagi sa deoxyribonucleic acid (DNA) test.

Ang asawa ug pipila sa mga anak ni Padura ang gikuhaan og DNA samples ug gipadala ngadto sa Afghanistan alang sa cross matching sa mga nakalas nga Filipinong airmen nga nakalas niadtong Oktubre 12, 2010 sa Kabul, Afghanistan.

Giisip sa mga kabanay sa mga nakalas nga airmen nga Valentines gift kanila ang pag-abot sa ilang minahal sa kinabuhi niadto gyung Pebrero 14, 2011.

Sa adlaw’ng Sabado si Lt. Padura adto ilubong sa Manila Memorial Park sa lungsod sa Liloan, samtang si 2lt. Castillo ilubong sa Mactan Island Memorial Gardens mga alas 12:00 sa udto.

Samtang si Tsgt. Elbanbuena sa adlaw’ng Domingo sa Mactan Island Memorial Gardens ug giingong hatagan ang tanan og full military honors sa Philippine Air Force. (BANAT NEWS)