CEBU, Philippines - Sobra sa P70 mil ang kantidad sa mga butang ug kwarta nga nasakiyo sa duha ka wala mailhing tulisan nga mitulis sa mga pasahero sa jeepney niadtong Miyerkules sa gabii diha sa barangay Bulacao, dakbayan sa Talisay.
Gawas niini usa ka drayber sa habal-habal ang nawagtangan og motorsiklo human unaya og carnap sa iyang pasahero kagahapon sa mga alas 3:00 sa kaadlawon diha sa sitio Nonoc, barangay Tabunok, Talisay.
Ang biktima sa tulis giila sa mga polis nga sila si Azenith Caballero Tolento, hingkod ang panuigon taga sitio Tiber, lungsod sa Minglanilla ug kawani sa Convergys, Eucelyn Aquino Salumbides, 28, taga barangay Tungkil, Minglanilla ug kawani sa Callteck ug Marc Wyne Tumaliwan Barcenas, 32, taga Maharlika Village, barangay Bulacao, Talisay ug kawani sa Visayas Community Medical Center.
Nakuha sa duha ka tulisan gikan kang Tolentino ang iyang cellphone nga nagkantidad nga P30 mil, TCL cellphone, P7 mil, kwarta, P900, ATM card sa RCBC Bank ug company ID.
Si Salumbides nakuhaan sa iyang Black Berry cellphone nagkantidad og P3, 500, ATM card sa Union Bank, SSS ID, company ID ug P200 nga kwarta.
Samtang si Barcenas nasakmitan sa iyang itom nga bag nga Occasana ang brand nga nagkantidad og P1,800, Ipod touch screen, P25 mil, Samsung cellphone, P17 mil, kwarta nga P4 mil ug company ID.
Ang tulo daling mi-report diha sa Talisay City Police Station sa barangay Poblacion human sa maong hitabo ug mibutyag nga gikan sila sa Minglanilla padulong sa dakbayan sa Sugbu dihang pag-abot sa nahitaboan nanakay ang mga tulisan.
Ug diha-diha mimando sa drayber pahunongon ang sakyanan ug dayon deklarang hold-up ug gipanguha ang kabtangan sa mga biktima ug dayon nangikyas.
Sa laing bahin, usa ka Michael Sandot nga drayber sa habal-habal ang giilogan sa iyang motorsiklo nga Honda XRM 125 nga dunay kombinasyon nga kolor itom ug puti ug nagtangag sa plakang UG-1210 sa iya rang pasahero.
Si Sandot mi-report ngadto sa TCPS nga usa ka wala mailhing lalaki ang misakay kaniya ug nagpahatud paingon ngadto sa Nonoc Homes sa sitio Nonoc apan pag-abot nila diha sa nahisgutang lugar kalit siyang gitionan niini og pusil dayon deklarang hold-up ug gipakanaog siya sa iyang motorsiklo. (BANAT NEWS)