9 batan-on sa talisay gihipos sa mga tanod

CEBU, Philippines - Kinse ka mga menor de edad ang gihipos sa mga tanod ug opisyal sa barangay San Roque, dakbayan sa Talisay tungod sa paglapas sa curfew niadtong Lunes sa gabii.

Si Kagawad Rafael Chan kinsa chairman sa committee on Women and Children’s Welfare sa konseho sa maong barangay sa pakighinabi sa Banat News mibutyag nga niadtong milabay’ng semana sila mibalik og implementar sa curfew sa mga batan-on human sila ma-organize og balik human sa milabay’ng eleksiyon.

Ang maong implementasyon sa curfew sa mga batan-on pinasubay sa ordinansa sa siyudad. Matud niya nga niadtong Sabado duna silay nasignit nga lima ka mga batan-on ug laing lima sa pagkasunod adlaw.

Gibutyag ni Chan nga uban sa mga nasignit ang taga barangay Tanke ug kasagaran kanila mga out of school youth ug walay laing mahimo mao ra ang maglibudsuroy sa kadalanan sa siyudad uban sa ilang mga barkada.

Ang kapolisan ug opisyales sa kabarangayan sa maong dakbayan miingon nga ang mga batan-ong maglibud-suroy kung dili maoy mamiktima maoy mabiktima sa mga krimen.

Kahinumduman nga ang konseho sa dakbayan sa Talisay mipasar og ordinansahon kabahin sa curfew sa mga batan-on human sa mga sunod-sunod nga mga insidente kaniadto sama sa gang wars ug mga kawat nga kasagaran sa mga suspetsado mga menor de edad.

Ang mga gihipos nga kabataan giuli ra ngadto sa ilang mga ginikanan human sila mapahimangnoi sa ilang responsibilidad.

Base sa City Ordinance sa Talisay ang mga ginikanan kansang anak maabtan sa curfew maoy palukaton sa mga bata ug pabayron og multa ingon man pagserbisyo sa mga bata pinaagi sa community work sulod sa upat ka oras sa unang kasaypanan ug magkadako ang silot sa mosunod pang susamang kalapasan.