CEBU, Philippines - Problema sa gugma ang gituohang motibo sa nagpadayong imbistigasyon sa kapulisan sa nahitabong pagpamusil patay sa fried chicken vendor nga gi-ambusan samtang paingon na untang mopauli sa Poblacion sa lungsod sa Sibonga niadtong Sabado sa alas 8:15 sa gabii.
Ang biktima nga si Nemesio Geolen Torres, 40, minyo molupyo ra sa nahisgutang lugar ug fried chicken vendor ug tempura.
Matud ni PO3 Ederlino Bacusmo, desk officer sa Sibonga Police dihang nahinabi sa Banat News duha ka tawong nagsakay og motorsiklo maoy gitumbok sa mga saksi nga mipusil sa biktima nga nagsakay sa iyang sikadsikad nga gikargahan sa iyang mga panindang fried chicken paingon na untang mopauli.
Ang biktima nga nakaangkon og duha ka samad pinusilan sa tiyan gihatud unta dayun sa Deiparine Hospital sa lungsod apan tungod sa seryuso nga kahimtang gi-refer dayun sa South General Hospital apan gideklarar nga dead on arrival.
Matud ni Bacusmo anggulo sa love triangle ang gitutukang motibo sa krimen. - (BANAT NEWS)