CEBU, Philippines - Duha ka lalaki ang nalandig ngadto sa tambalanan human kini pamusila tungod sa personal nga bangi niadtong Sabado sa gabii ug kagahapon sa kaadlawon diha sa duha ka mga barangay sa lungsod sa Sibonga.
Ang unang insidente nahitabo duol sa merkado publiko sa barangay Poblacion, Sibonga mga alas 8:15 sa gabii niadtong Sabado.
Nakaangkon og duha ka samad pinusilan sa tiyan si Numecio Torres, 40, usa ka tempura vendor ug residente sa nahisgutang barangay human kini pusila sa wala mailhing lalaking nag-angkas sa motorsiklo.
Si Torres daling gidala ngadto sa Deiparine Medical Clinic apan tungod sa kahimtang niini gibalhin ngadto sa South General Hospital sa dakbayan sa Naga.
Si PO3 Antonio Sanchez, duty desk officer sa Sibonga Police Station mibutyag sa Banat News kagahapon nga si Torres sakay sa iyang traysikad nga gikargahan usab sa iyang tindang tempura paingon na untang mopauli.
Apan pag-abot niya diha sa oval nga karsada duol sa merkado usa ka wala mailhing lalaki kinsa angkas sa motorsiklo nag-atang nang daan ug walay daghang pangutana gipusil niini ang biktima.
Sa laing bahin, usa ka 23-anyos nga lalaki kinsa gikan sa disko ang nakaangkon og bun-og ug samad pinusilan human kini hapaka sa pusil una pusila kagahapon sa kaadlawon diha sa barangay Tubod, bukirang barangay sa Sibonga nga dunay gilay-ong walo ka kilometros gikan sa barangay Poblacion.
Ang biktima giila sa mga polis nga si Olimpio Rellon, residente sa barangay Tubod, nakaangkon kini og bun-og sa tiyan human bunali ni Edwin Sarda, 45, taga barangay Poblacion sa nahisgutang lungsod.
Apan wala matagbaw ang suspetsado gipusil usab niya si Rellon ug naigo kini sa abaga.
Si Rellon daling gidala ngadto sa Deiparine Medical Clinic apan tungod sa kahimtang niini gibalhin ngadto sa Vicente Sotto Memorial Medical Center. Si Sarda daling miikyas human sa hitabo ug padayon pa kining gipangita sa mga polis.
Si PO3 Sanchez mibutyag nga ang mga paryente ni Rellon ug Sarda nagkabangi kaniadto. Sa wala pa mahitabo ang ulahing insidente si Rellon gikan kini sa usa ka disko diha sa ilang lugar dihang paingon na untang mopauli gitawag kini sa iyang bayaw ug gipaila-ila ngadto sa suspetsado.
Apan giingong human sa pag-ila-ila nasuko ngadto sa biktima ang suspetsado ug mihulbot kini og pusil dayon hapak ngadto sa tiyan ni Rellon.
Si Rellon midagan tungod sa kahadlok human mahapaki og pusil apan gipusil gyud kini sa suspetsado. (BANAT NEWS)