Trabahante sa wood craft giurom patay

CEBU, Philippines - Usa ka trabahante sa wood craft factory sa barangay Lamac sa lungsod sa Consolacion nga gituohang giurom napalgang patay na sulod sa bunk house kagahapon sa alas 10:00 sa buntag.

Ang namatay mao si Jurry Dence, 31, ulitawo, nga lumad nga taga sitio Ayongan, barangay Maticol sa lungsod sa Tubuso, Negros Occidental ug stay-in worker sa wood craft factory nga gipanag-iya ni Boy Oyaca nga nahimutang sa maong dapit.

Si SPO4 Joseph Yongco sa kapolisan sa nahisgotang lungsod nga nahinabi sa Banat News miingon nga si Dence nadiskobrehan sa mga kauban niining trabahante dihang namatikdang wala kini makatambong sa iyang trabaho.

Matud pa niya nga gituohan sa mga kauban nga nahinanok lang kini sa pagkatulog sa sulod sa ilang bunk house apan nakurat nalang sila dihang pagpukaw nila niini patay na.

Si SPO4 Yongco miingon nga nasuta nila nga walay foul play ang kamatayon niini sanglit wala man sila makakaplag og mga timailhan sa lawas niini nga agi sa mahait nga hinagiban o bun-og nga agi sa gahi nga butang. (BANAT NEWS)