CEBU, Philippines - Samdan ang usa ka estudyante human giingong gipusil sa dughan sa usa ka pari pasado alas-12 kagahapon sa udto sa barangay Guinsay syudad sa Danao.
Base sa nadawat nga text message nganhi sa Banat News gikan ni Sr. Supt. Erson Digal ang director sa Cebu Provincial Police Office, ang biktima nailhan nga si Mark Robert Cecilio Ymbong, 19, 2nd year student sa Colegio De San Antonio De Padua sa kursong Criminology ug lumad nga molupyo sa lungsod sa Cordova.
Giimbestigar kagahapon si Rev. Fr. Jonathan Durano Lao, 60, nga maoy kura paroko sa Colegio De San Antonio De Padua ug molupyo sa barangay Poblacion syudad sa Danao.
Sumala pa base sa imbestigasyon sa kapolisan sa syudad sa Danao nga mikat-kat ang biktima sa manga aron sa pagkuha og bunga apan wala lang damha sa kalit lang nga mipabuto si Lao ngadto sa biktima sa walay igong hinungdan ug naigo sa dughan.
Giingong ang gigamit sa pagpusil sa biktima mao ang usa ka air gun, samtang ang biktima dali usab nga gidala sa Danao city district Hospital sa iyang igsuon sa pari nga si Michelle Lao.
Nasayran nga ang maong kahoy nahimutang sa likod nga bahin sa quarter sa maong pari nga nahimutang usab sulod sa compound sa maong tunghaan.
Base sa report sa Balitang Bisdak, gikatahong ang biktima mibutyag nga gibadlong siya sa pari hinungdan nga mikanaog siya apan giingong gipusil siya sa maong pari.
Samtang sa pagbuhat niining balita, kasamtangan pa nga gipaubos sa imbestigasyon ang maong pari diha sa presinto sa Danao Police Station. - BANAT NEWS