CEBU, Philippines - Giplano sa kagamhanan sa dakbayan sa Lapulapu ang pagpamalit og dugang kahimanan sa kapolisan nga naglakip sa armas, mga bala ug mga sakyanan nga magamit sa mga kalihokan nga may labot sa pag-atiman sa kahapsay ug kalinaw.
Si Mayor Paz Radaza nga nahinabi sa Banat News miingon nga ang maong lakang maoy tubag sa gihangyo ni Senior Superintendent Anthony Obienza, hepe sa kapolisan sa Lapulapu aron isangkap sa mga panginahanglan sa augmentation force nga mga polis nga gitakdang idestino sa dakbayan.
Matud pa ni Radaza nga nagpadayon na usab ang proseso sa karon giplano niyang pagpalit og bullet proof nga van type nga sakyanan alang sa mga sakop sa Special Weapon and Tactics (SWAT).
Si Radaza nagkanayon nga mopalit usab sila og lima ka motorsiklo nga idugang sa mga sakyanan sa kapolisan.
Gitataw niya nga sa sunod buwan, balhinon na ang buhatan sa Lapulapu City Police Office (LLCPO) didto sa bag-o nilang edipisyo nga anaa sa sulod sa compound sa city hall.
Dugang pa niya nga ilang palig-onon ang ilang mga sakop sa tourist police pinaagi sa paghatag usab og dugang kahimanan niini aron masiguro ang kinabuhi sa mga turista nga magtampunsisok sa maong dakbayan. - BANAT NEWS