Reklamante gihagit pagsang-at og reklamo

CEBU, Philippines - Gihagit ni Chief Insp. George Ylanan, hepe sa Investigation and Detective Management Branch (IDMB) sa Cebu City Police Office (CCPO) ang complainant diha sa barangay Tejero, siyudad sa Sugbu nga mopatim-aw ug moduso’g pormal nga reklamo batok sa iyang mga sakop.

Nasayran si CCPO Director Melvin Ramon Buenafe mibutyag sa media nga nakadawat siya og reklamo gikan sa residente sa nahisgutang barangay kabahin sa operasyon sa mga sakop sa IDMB sa miaging semana ug midakop sa usa ka drug pusher.

Apan giingong wala kini dad-a sa ilang buhatan ug gidala sa South Road Property (SRP) apan gibuhian ra dayon human giingong gipangayoan og P150 mil sa mga pulis.

Si Buenafe miingon nga duna siyay himuong imbestigasyon aron masayran si kinsa kining mga pulis sa IDMB nga gireklamong nangilkil sa ilang dinakpan ug mibuhi niini.

Si Ylanan nagkanayon nga nakigsulti na siya kang Buenafe kabahin sa maong pasangil apan si Ylanan nagkanayon nga kinahanglan mopakita ang complainant ug barogan ang alegasyon batok sa iyang mga sakop.

Gihagit niini ang impormante nga itug-an si kinsa sa iyang mga sakop ang nalambigit niini aron usab dili maduhig ang ilang organisasyon lakip na ang iyang buhatan diin siya maoy pangulo niini.

Gihulagway ni Ylanan nga dili makiangayon ang pasangil tungod kay hugot ang ilang kampanya batok sa ilegal nga drugas dinhi sa dakbayan.

“Usa o duha, sila ra. I-pinpoint to niya ang pulis (complainant) kay ma-suffer man ang tibuok organisasyon,” hagit pang Ylanan.

Giklaro niini nga andam niyang ipa police line-up iyang mga sakop aron matumbok ug aron ilang ma-imbestigahan. (BANATNEWS)