CEBU, Philippines - Usa sa duha ka sakop sa Crips gang nga suspetsado sa pagpamusil patay sa usa usab ka sakop sa Bloods gang sa miaging kaadlawon nadakpan sa kapolisan didto sa balay niini sa barangay Carreta, sa dakbayan sa Sugbo sa miaging hapon.
Ang nadakpan mao si Roselo Rosales, 22, ulitawo nga nagpuyo sa maong dapit, samtang ang kauban niya sa maong krimen nga si Jesson Racasa alyas Taba nga taga dalan Gepodromo sa dakbayan sa Sugbo padayon pang gipangita sa kapolisan.
Si Inspector Ramil Morpos, hepe sa Investigation Detection and Management Bureau (IDMB) nga nahinabi sa Banat News miingon nga si Rosales ug Racasa kinsa pulos sakop sa Crips `gang maoy gitumbok sa 9-anyos nga batang lalaki kinsa nakasaksi sa nahitabong pagpamusil sa miaging kaadlawon didto sa sitio Maghusay sa barangay Subangdaku, dakbayan sa Mandaue.
Matud pa ni Inspector Morpos nga misumbong ang bata kanila nga kuyog siya niadtong higayona sa biktima nga mitambong og disco sa sitio Mahusay diin didto usab ang mga suspetsado.
Unya matud pa sa bata nga nakita gyud niya si Rosales nga mitunol og armas ngadto kang Racasa nga maoy gigamit niini sa pagpusil sa biktima.
Si Inspector Morpos miingon nga human maigo sa dughan nahagba ang biktima sa yuta samtang ang mga suspetsado misibat usab dayon.
Gidala ang biktima sa Mandaue City District Hospital apan gideklarar kini sa mga doktor nga dead on arrival. (BANAT NEWS)