NMIS-7 nanguha na'g sample sa karne diha sa carbon market

CEBU, Philippines - Gisugdan na kagahapon sa National Meat Inspection Service ang pagkuha og 25 ka mga sample sa karne sa Carbon Market. Sumala pa sa Regional Director sa NMIS nga si Dr. Romeo Capa nga   magpadayon karong adlawa ang pagkuha na pud og laing 25 ka sample sa karne sa siyudad sa Sugbo.

Ang nakuha nga mga sample, dad-on sa ilang laboratoryo sa Quezon City busa dili pa matino kung kanus-a makuha ang resulta ninii.

Una na nga gisugdan ang random sampling didto sa dakbayan sa Mandaue sa milabay nga adlaw ug human sa siyudad sa Sugbo, isunod dayon ang dakbayan sa Talisay ug Lapulapu.

“Makakatulong talaga ang pagkuha ng sampling dahil ang resulta nito ay magsilbing gabayan sa mga kunsumidor sa pagbili ng karne. At malalaman din natin kung ano dapat ang i-improve sa paraan ng pagbebenta ng karne,” nagkanayon si Capa.

Sumala pa ni Capa nga daghan og hinungdan kung nganong mataptan og kagaw ang karne. Usa na niini ang pasilidad sa ihawan ug ang proseso niini sa pagbaligya.

Dugang pa niya nga duna pu’y responsibilidad ang mamalitay sanglit kinahanglan nila nga ibutang og tarong ang karne sa saktong lugar sa higayon mapalit na nila ang produkto.

Nanawagan usab si Capa ngadto sa mga tindera og karne nga mogamit gyud og plastic kung mohikap sa karne ug kinahanglan nga mosul-ob usab og hair net aron di makontaminado ang karne.

Samtang ang hepe sa Department of Veterinary Medicine and Fisheries (DVMF) nga si Dr. Alice Utlang mihangop sa gihimong operasyon sa NMIS.

“Nindot gyud na ilang gibuhat, aron mahibaw-an gyud sa mga tawo kung unsa kaluwas ang karne sa siyudad,” matud pa ni Utlang.

Dugang pa niya nga ang tanang tindera og karne sa Carbon Market kagahapon ang mihangop sa presensiya sa NMIS. Nasayran nga istrikto usab karon ang DVMF sa pag-monitor sa mga sakyanan nga gigamit sa pagbiyahe sa karne gikan sa ihawan paingon sa merkado ug kinahanglan nga naka-rehistro kini sa ilang buhatan.

Subling gipahimangnoan ni Utlang ang publiko nga mopalit gyud og karne sa mga tindahan nga dunay meat inspection certificate. (BANAT NEWS)