CEBU, Philippines - Angol ang usa ka tawo nga gidunggab sa iyang silingan sa sitio Tamia, barangay Basak, dakbayan sa Lapulapu sa miaging hapon.
Ang biktima mao si Rogelio Tio, Jr. taga sitio Sangi sa barangay Pajo sa maong dakbayan ug ang nagdunggab mao si Richard Latuma, hingkod ang panuigon ug molupyo usab sa maong lugar.
Si PO1 Joinard Cinco sa homicide section sa kapolisan sa maong dakbayan miingon nga nagbarog lang ang biktima sa daplin sa karsada sa maong dapit kay nagpaabot og sakyanan dihang kalit lang mitumaw ang suspetsado ug gihansakan sa iyang kutsilyo ang dughan sa biktima.
Human sa maong pagpanunggab ang suspetsado dali nga misibat pahilayo sa maong lugar ug ang biktima dali usab nga gidala sa Lapulapu District Hospital apan gibalhin kini sa Vicente Sotto Memorial Medical Center sa dakbayan sa Sugbo.
Padayon pang gipangita sa kapolisan ang suspek samtang wala pa hisayri ang hinungdan sa maong pagpanunggab. (BANAT NEWS)