CEBU, Philippines - Hingpit na nga nasulbad sa kapolisan sa Mandaue City Police Office (MCPO) ang kaso sa pagpangawat sa panimalay ni Capitol Consultant Rory Jon Sepulveda sa barangay Tawason, dakbayan sa Mandaue human hidakpi ang kawatan.
Si Inspector Ramil Morpos, hepe sa Investigation Detection and Management Bureau (IDMB) miila sa suspetsado nga mao si Francisco Libradilla, hingkod, nga taga barangay Duljo Fatima sa dakbayan sa Sugbo.
Matud pa ni Inspector Morpos nga ang nakadakop sa maong suspetsado mao ang kapolisan sa Talamban Police Station dihang nangawat kini sa maong lugar.
Dugang pa niya nga sa ilang imbestigasyon nga gihimo giangkon ni Libradilla nga siyay misaka sa balay ni Sepulveda niadtong Nobyimbre 22 sa miaging tuig ug gikiriw ang usa ka laptop ug iya kining gibaligya ngadto kang Jerson Inolva, nga iyang barkada.
Busa nabawi usab sa kapolisan ang maong butang gikan sa gibaligyaan niini.
Si Inspector Morpos miingon nga si Libradilla ug Inolva ilang pasakaan og kaso ug gipaabot usab nila ang dugang pang mga reklamo gikan sa mga nabiktima sa pangawat sa maong suspetsado. (BANAT NEWS)