3,000 panimalay sa mga sapa demolison

CEBU, Philippines - Dunay dili mominos sa tres mil ka mga balay nga ilegal nga gipangtukod sa mga sapa dinhi sa tibuok siyudad sa Sugbo sumala pa sa hepe sa Department for the Welfare of the Urban Poor (DWUP) nga si Danny Gabiana.

Naglaraw ang dakbayan nga hawanan na sa maong mga imprastraktura ang kasapaan gumikan kay sila maoy nag-unang nabutang sa peligro panahon sa ting-uwan tungod sa baha.

Dugang rason mao nga ang ilang mga balay nakaali sa natural nga agianan sa tubig baha ug magtipun-og diha sa ilaha ang mga basura gikan sa ibabaw maong moawas ang baha ngadto sa mga kanal ug uban pang bahin sa syudad.

Si Gabiana miingon nga nagsugod na karon ang kagamhanan sa pagpahawa kanila apan siya mipasalig nga ipaagi nila kini sa tawhanong pamaagi. Niining higayona, ang gitagaan nila og unang aksyon ang Mahiga River sa barangay Mabolo diin 1,200 ka mga pamilya ang maapektahan niini.

Dugang pa ni Gabiana nga ilegal gyud kini nagpuyo apan gipasalig sa siyudad nga magtukod sila og susamang konsepto sa Devotee City diin temporaryong papuy-on ang mga tawo sa container vans.

“Tagaan gyud sila og temporary shelter, mopuyo una sila diha samtang nangita pa ang siyudad og relocation site,” nagkanayon si Gabiana.

Gikatakda usab nga mohimo og assessment ang Department of Social Welfare and Services (DSWS) ngadto sa mga maapektohan nga pamilya sa demolisyon aron masuta ang mga nag-unang panginahanglanon niini.

Gawas sa temporaryong pinuy-anan, gipahibalo ni Acting Mayor Joy Augustus Young nga hingusgan ang “Balik Probinsya Program.”

Sumala pa ni Young nga iyang nabantayan nga daghan nga taga probinsya ang nagpuyo sa mga squatters area busa mas maayong papaulion nalang sila sa ilang tagsa-tagsa ka dapit aron dili kini maghuot dinhi sa siyudad.

Samtang gipadayag sa City Administrator nga si Atty. Jose Marie Poblete nga anam-anamon sa siyudad ang himuon nila nga demolisyon sanglit   dili man kini tanan masulod sa temporaryong pinuy-anan nga tukoron sa siyudad.

Sumala pa ni Poblete nga kinahanglan nga dunay demolisyon nga mahitabo aron dali ra nga makasulod ang mga ekipo sa Department of Engineering and Public Works (DEPW) nga maoy mohimo sa pagkabkab sa sapa.   (BANAT NEWS)