CEBU, Philippines - Usa ka lalaki ang gitigbas patay sa iyang silingan nga kalit misulong sa iyang balay pasado alas-11 sa miaging gabii sa sitio Mahayahay, barangay Calamba ning dakbayan.
Ang biktima nailhan nga si Rowel Diaz Maraviles, 32, molupyo sa Lopez St. sa maong barangay samtang ang suspetsado nailhan usab nga si Michael Jamito, 23.
Sa inisyal nga imbestigasyon sa kapolisan nasayran nga ang biktima anaa na sulod sa ilang panimalay padulong na untang mopahuway dihang nanuktok ang suspek ug iyahang giablihan.
Sa walay igong hinungdan kalit lang nga gitigbas sa suspetsado ang bitkima sa ulo, tiyan ug tuong bahin sa iyang bukton agi og pagpanagang gamit ang usa ka 18-pulgadas nga bolo.
Tungod sa maong panghitabo ang biktima dali usab nga gidala sa Vicente Sotto Memorial Medical Center apan gideklarar kini nga dead on arrival.
Samtang ang suspetsado wala makaikyas human kini nasikop dayun sa barangay kagawad nga si Eldy Ygonia uban sa upat niini ka barangay tanod ug kasamtangan karun nga nagtingkagol ang suspetsado sa karsel sa Cebu City Police Office.
Ang patay’ng lawas sa biktima kasamtangan usab nga nahimutang sa Cebu Memorial Funeral Homes.
Ang kapolisan nag-imbestigar karun kun unsa ang posibleng hinungdan sa pagpanigbas sa suspetsado. Ang kapolisan padayon pa sa imbestigasyon sa maong kaso. (BANAT NEWS)