CEBU, Philippines - Human sa resulta sa gihimong laboratory test sa Department of Science and Technology nga nagpakitang positibo sa kagaw nga E.Coli ang pipila ka mga nakuha nilang sample nga chorizo sa kamerkaduhan sa dakbayan sa Sugbu, Mandaue ug Talisay gipahugtan karon sa maong mga syudad ang pagpatuman sa mga lagda sa meat processing sa kamerkaduhan.
Sugod sa Pebrero 5 gipaabot ipatuman sa Department of Veterinary Medicine and Fisheries sa dakbayan sa Sugbu ang estriktong mga lagda alang niadtong mga mamuhatay og mga processed foods sama sa chorizo ilabina diha sa Carbon Market ug ubang dapit dinhi sa dakbayan.
Mao kini gipahibawo ni City Veterinarian Alice Utlang sa usa ka interbyu sa usa ka lokal nga sibyaanan. Naglakip sa regulasyon ang oras pagpanghimo og chorizo nga gikinahanglang ipahigayon lang gikan sa alas-8 sa buntag hangtud sa alas 4:00 sa hapon.
Gawas niini gidugang ni Dra. Utlang nga gi-obligar nasab nila ang mga tagdumala og chorizo pagpalukat og health cards sa mga trabahador niini nga maoy mamuhat og chorizo ug ingon man ang pagsul-ob kanila og uniporme nga senina aron limpyo tan-awon.
Gani hasta ang mga gamit girekomendar usab nga limpyo ug dili tugutang motugkad sa semento ang pisi nga gamiton nga higot sa chorizo.
Matud ni Utlang nga kadtong makalapas niini pahamtangan og silot pinaagi sa pagpabayad og multa ngadto sa mga stall owners katulo pilo pilo-on sa usa ka buwan nga abangan. Aduna na say idestinong meat inspector nga magsuroysuroy 24- oras aron mag-monitor sa mga mamuhatay og chorizo diha sa Carbon ug ubang merkado publiko dinhi sa dakbayan.
Samtang sa dakbayan sa Talisay, ang chairman sa komitiba sa panglawas sa dakbayan sa Talisay nga si Konsehal Choy Aznar miawhag sa city health ug buhatan sa veterinarian sa siyudad nga mopahigayon og inspection sa mga kamerkadohan sa Talisay.
Matud ni Aznar nga naalarma siya kabahin sa report ug buot niyang masayran kun diin gikan ang mga gibaligyang chorizo sa merkado publiko sa Tabunok. Si Roger Paller, ang public information officer sa dakbayan sa Mandaue mitug-an sa Banat News nga human sa maong report gimando na sa City Veterinarian nga si Daisy Penetrante ang pag-usa sa dapit nga buhatan sa chorizo diha sa merkado publiko sa dakbayan.
Matud pang Paler nga diha na sa ibabaw nga bahin himuon sa tanang chorizo vendors ang meat processing ug kanunay nang monitoron sa City Veterinarian ug sa market administrator nga si Cesar Mercadal Jr. (BANAT NEWS)