Blasting caps, cyanide nasakmit sa CCPO

CEBU, Philippines - Mga kagamitan alang sa paghimo og dinamita ug liboang blasting caps ang nasakmit sa kapolisan sa Cebu City Police Office sa gipahigayon nga joint buybust operation sa sitio Pooc Mahayahay barangay Pasil pasado ala-una sa hapon kagahapon.

Ang mga nasikop mao sila si Eduardo Ceniza, 61, giingong maoy tighimo niini, uban sa iyang mga trabahante nga sila Edgardo Igot ug Percival Velargo.

Matud pa sa hepe sa kapolisan sa syudad sa Sugbo, Sr. Supt. Melvin Buenafe, nga ilang gipaubos sa surveillance ang suspetsado ug dihang nakumpirmar ang report nga ilang nadawat mipahigayon sila og buy bust operation sa panimalay ni Ceniza.

Tuod man ang kapolisan nakigsabot nga mopalit ni Ceniza og 1000 ka buok nga blasting caps nga nagkantidad og P15 mil, human matunol ang ‘bayad’ daling gisikop si Ceniza ug iyang mga trabahante.

Midugang si Buenafe nga lakip sa ilang nasakmit ang dul-an upat ka kilong cyanide nga gamiton paghilo og isda, 9,000 blasting caps, 1,100 timed-fuse nga blasting caps, walo ka kahong non-electric blasting caps factory made, usa ka rolyong pabilo, ug uban pa. Base sa ilang nakalap nga impormasyon si Ceniza nagsuplay usab og blasting caps sa Mindanao.

Ang hepe sa kapolisan sa Central Visayas Chief Supt. Ager Ontog Jr. mipasabot hinuon nga wala kini koneksyon sa terorismo kondili alang lang gyud sa illegal fishing gamiton.

Gisubay na karon sa kapolisan kun asa gikan ang maong mga kahimanan ug pulbura tungod kay aduna may serial numbers ang gisudlan niini nga mahimo nilang masubay. (BANAT NEWS)