Senior citizen sa Talisay nakapahimos sa medical mission

CEBU, Philippines - Mokapin sa 1000 ka mga senior citizens sa dakbayan sa Talisay ang nakabenipisyo sa gipahigayong medical mission sa kagamhanan sa probinsiya sa miaging Miyerkules sa buntag sulod sa sports complex sa barangay Poblacion. Si Felipa Solana, hepe sa City Social Welfare and Development sa pakighinabi sa Banat News nagkanayon nga gawas sa medical mission, ang mga senior citizen gihatagan usab og mga tsinelas ug gatas.

Apan dili lang ang mga senior citizens maoy nakapahimulos kundili lakip na ang mga sakop sa Barangay Health Workers sa kabarangayan sa Talisay ug mga day care worker kinsa gitunolan og honorarium sa kagamhanan sa probinsya kauban ang mga tanod nga gipanghatagan usab og mga kit nga may mga nagkalainlaing sulod diin usa niini mao ang flashlight.

Matud ni Solana nga karong tuiga maoy ikaduhang tuig sa “Halad sa Gugma alang Kang Lolo ug Lola” nga proyekto sa probinsiya nga gipangulohan ni Gobernador Gwendolyn Garcia. (BANAT NEWS)