CEBU, Philippines - Giaprubahan sa Konseho sa dakbayan sa Mandaue ang pagdili na sa paggamit og plastic ug styropor sa mga tindahan ug mga malls sa maong dakbayan.
Atol sa regular session sa konseho sa dakbayan sa Mandaue human sa ikatulo ug pinal nga pagbasa sa ordinansa 12-2010-562 kon “Plastic Bag Prohibition Ordinance” nga gipangamahanan ni Kon. Demetrio “Jun” Cortes Jr..
Gumikan sa baha nga nasinati sa dakbayan sa Mandaue sa milabay’ng Martes sa mga kabarangayan ug mga dagkong agianan sa dakbayan human sa duha ka oras nga pagbundak sa ulan, ilang nakita ang dakong importansiya sa maong ordinansa.
Base usab sa ilang tigum sa mga sakop sa City Disaster Coordinating Council sa Mandaue nasuta nga usa sa nakabara sa mga kanal ug sapa ang mga plastic ug styropor.
Gipasabot sa maong ordinansa nga inay plastic bags ug styropor ang gamiton nga iputos sa mga pinalit, bulsitang papel nalang ang gamiton sa mga tindahan.
Ang maong matang sa putos dali kini nga malata kun ugaling ilabay kini o mabutang sa mga basa nga dapit sama sa kanal ug kasapaan diin dili kini makahatag og pagbara sa mga drainage systems. - BANAT NEWS