Mandaue, Cebu City 'nangandam' sa subling paglunop nga mahitabo

CEBU, Philippines - Gimando ni Mayor Jonas Cortes ngadto sa mga barangay kapitan sa dakbayan sa Mandaue ang higpit nga paghawan sa mga ilegal nga estraktura nga nahimutang sa mga kasapaan ug mga kanal sa dakbayan.

Kini man gud maoy gibasol nga nakaingon sa pagkabara sa mga basura ug nakabara dayon sa nagdagayday nga tubig-baha gikan sa ibabaw nga bahin sa dakbayan maong miawas ang tubig ngadto sa kabalayan. Apan wala pa gani masugdi ang maong kamandoan daghan nang mga residente ang misupak niini gumikan kay wala silay laing kapuy-an ug walay alternatibong gihatag nga luna nga kabalhinan ang dakbayan.

Dugang nga gimando ni Cortes ang pagpalig-on sa Barangay Disaster Brigade (BDB) aron maoy daling makatubag sa higayon nga adunay mahitabong katalagman.

Gitataw ni Cortes nga gikinahanglan kaayo ang pagpalig-on sa DBD sa kabarangayan human makita niini ang panginahanglan dihang kalit nga nahitabo ang paglunop sa tubig sa mga barangay sa dakbayan tungod sa kusog nga pagbunok sa ulan.

Dihang nahitabo ang kusog nga pagbunok sa ulan niadtong miaging Martes sa buntag ang mga sakop sa Bureau of Fire Protection search and rescue teams, Accident Control and Rescue Team (ACERT) ug Emergency Rescue Unit Foundation ingon man mga sakop sa Armed Forces of the Philippines maoy miresponde.

Sa barangay Guizo, gatusan ka mga tinun-an uban sa ilang mga magtutudlo ang giluwas tungod kay miabot na sa hawak ang tubig baha.

Gipaabot nga ideklarar ilawom sa state of calamity ang barangay Guizo, barangay Tipolo, barangay Basak, barangay Banilad, barangay Subangdaku ug uban pa.

Si Cortes mipahibalong iyahang sigurohon sa iyang administrasyon nga mapatuman ang master plan nila sa ilang mga kanal ug nangayo na siya og pundong P1 bilyon niini.

Samtang sa dakbayan sa Sugbu, gimando ni Mayor Michael Rama paglambo pa sa drainage system sa dakbayan sama sa padayong pagpanglimpyo ug pagpalapad niini.

Lakip sa plano ang pagpalawom pinaagi sa dredging sa mga kasapaan sa dakbayan aron malikayan ang pag-awas niini nga moresulta sa pagbaha. Gipanghingusgan usab ni Cebu City Councilor Roberto Cabarrubias ang programang Food For Work diha sa barangay Tejero diin ang mga residente mismo ang manglimpyo sa ilahang tagsa-tagsa ka mga kanal.

Ang maong programa himuon diha sa sitio Laurente ug Sambag 1 diin ang mga manglimpyo hatagan og usa ka kilong bugas humay, duha ka lata sa sardinas ug usa ka noodles matag adlaw. Ang maong programa adunay gitaganang pundo nga P228 mil alang sa pagkaon sa mga motabang.

Ang sitio Laurente adunay 40 ka tawo nga molimpyo sulod sa 10 ka adlaw samtang sa sitio Sambag 1 aduna usab 40 ka tawo sulod sa walo ka adlaw.

Si Meriam Cabaluna, Administrative Officer IV sa buhatan ni Cabarrubias mibutyag sa mga tigbalita nga makatabang ang maong programa nunot na usab sa nahitabo sa milabay’ng Martes.

Dugang pa niya nga dili lang barangay Tejero ang makabenepisyo niini sanglit isunod ang barangay Mambaling nga aduna nay 47 ka tawong nagpalistang manglimpyo.

Kagahapon sa buntag, usa ka balay sa dakbayan sa Kalunasan sa dakbayan sa Sugbu ang nahugno mugna gihapon sa pagbunok sa ulan apan walay gikareport nga nasakitan sa maong hitabo. - BANAT NEWS