Chopper nga gisakyan ni gob. Garcia wa katugpa sa St. Bernard, So. Leyte

CEBU, Philippines - Wala katugpa ang gisakyang chopper ni Gob. Gwendolyn Garcia sa iya untang pagbisita sa lungsod sa St. Bernard, Southern Leyte kagahapong adlawa.

Kini gumikan sa dili maayong panahon kagahapon ug dili makita ang lugar nga matugpahan sa chopper.

Hinungdan nga sa Sogod, Southern Leyte nalang nitugpa ang gobernador ug gisugat sa mayor sa maong lungsod.

Si Garcia gidapit ni Mayor Rico Rentuza sa pagbisita sa lugar nga gibahaan ug midahiling yuta sa milabay’ng pagbunok sa uwan.

Si Rentuza mibisita sa gobernador niadtong Lunes aron pagdawat sa tunga sa milyon ka pesos nga hinabang sa Kapitolyo alang sa mga biktima sa baha ug landslides.

Naaghat si Garcia pagbisita sa lugar human gitaho ni Rentuza nga sa 30 niya ka barangay, 25 niini ang apektado ug sukwahi sa nasayran sa gobernador nga upat lang ka barangay.

 Ang pagbisita ni Garcia gitumong unta aron pagsusi sa tinud-anay nga kahimtang aron iyang kabasehan sa pagdugang sa hinabang gikan sa lalawigan sa Sugbo. - BANAT NEWS