Mi-carnap sa motor sa polis tiklo

CEBU, Philippines - Mikagulkol na sa prisohan ang usa ka carnapper nga misakiyo sa motorsiklo sa polis sa dakbayan sa Mandaue human kini dakpa sa mga estambay sa maong dakbayan sa miaging adlaw.

Ang suspetsado giila nga si Michael Russel, 30, nga taga sitio Sangi, barangay Pajo, dakbayan sa Lapulapu.

Si Inspector Ramil Morpos sa Investigation and Detective Bureau (IDMB) sa Mandaue City Police Office (MCPO) miingon nga si Russel maoy mikawat sa motorsiklo ni SPO2 Panfilo Boboy Sanchez sa Mandaue City Police Office sa miaging tuig.

Hinuon nabawi sa kapolisan ang motorsiklo ni Sanchez didto sa gibaligyaan ni Russel niini sa lungsod sa Argao. Matud pa ni Morpos nga laing motorsiklo ang ilang nabawi nga gipanag-iya sa taga barangay Maguikay sa maong dakbayan nga gikawat usab ni Russel sa miaging semana.

Si PO3 Joselito Catabas sa IDMB nga nahinabi sa Banat News miingon nga nadakpan si Rusell sa mga estambay sa barangay Ibabao dihang gikabay-an na niini ang motorsiklo ni Renaldo Villaceran nga taga barangay Alang-Alang sa maong dakbayan.

Matud pa ni Catabas nga misulod si Villaceran sa usa ka buhatan sa barangay Ibabao ug nakurat na lang kini dihang nakita niya nga midali-dali pagsakay ang suspetsado ang iyang motorsiklo nga iyang giparking daplin sa karsada.

Iya dayon kining gisundan ug dihang mihunong kini sa stop light sa eskina A.C. Cortes Avenue sa barangay Ibabao sa maong dakbayan nagpakitabang siya sa mga estambay nga maoy nakasignit dayon sa suspetsado.

Gidudahan sa kapolisan nga kadaghan na maka-carnap og mga motorsiklo ang maong suspetsado. - BANAT NEWS