CEBU, Philippines - Ang Cebu City Public Library and Information Center (CCPLIC) malipayong mibutyag nga sulod sa tuig 2010 nakadawat kini og 1,568 volumes sa mga libro gikan sa donasyon sa nagkadaiyang mga indibidwal.
Bisan mikunhod ngadto sa 57 porsiyento ang mga mobisita tungod sa pag-renovate sa Rizal Memorial Library (RML) niadtong 2009 ug tungod sa ka-limitado sa lugar mihimo og extension sa gawas ang mga empleyado niini alang sa mga researchers.
Dugang pa niini, ang mga kahigalaan sa library midonar usab og bag-o nga Epson Computer Printer alang niini ug mi-sponsor og usa ka tuig nga subskripsyon sa Readers Digest.
Si Cecilia Brainard usa ka inila nga Cebuana novelist sa California, personal nga midonar sa iyahang mga libro sa library.
Sa gipakitang Accomplishment/Comparative Report sa Public Library sulod sa mga tuig 2006-2010, moabot sa 127,820 ang mga mibisita ug mga researchers niini.
Ang CCPLIC adunay 10 ka buok empleyado diin anaay nagpabilin nga 15 ka bakante nga posisyon sa pagkakaron.
Ang labing gipangita nga posisyon mao ang Librarian III ug Librarian I diin gikinahanglan nga malingkuran na kini karong tuig 2011.
Giingong ini’g kahuman sa renovation sa RML gipaabot nga modugok ang mga mobisita sa library.
Samtang sa laing bahin si Carlo Dugaduga sa Public Information Office (PIO) mipahibalo nga modawat ang PIO og mga Mass Communication Interns sa nagkadaiyang institusyon.
Si Dugaduga mipadala na og suwat sa College of Arts and Sciences sa matag tunghaan aron sa pagpahibalo niini. - BANAT NEWS