Igsoong P-Noy mitambag sa mga estudyante sa Jaclupan Elementary School

CEBU, Philippines - Ang igsuon ni President Noynoy Aquino nga si Pinky Abellada miawhag sa mga tinun-an sa kindergarten sa Jaclupan Elementary School (JES) sa dakbayan sa Talisay nga maningkamot sa ilang pag-eskuwela alang sa ilang maayong kaugmaon.

Atol sa programang gipahigayon sa turn-over sa classroom sa kindergarten nga gipatukod sa Aklat Gabay, Aruga Tungo sa Pag-Angat at Pag-Asa Foundation Inc. (AGAPP) sa nahisgutang tunghaan, si Abellada kinsa maoy chairperson sa nahisgutang foundation nagkanayon nga ang ilang (estudyante) kaalam maoy ilang bugtong bahandi nga dili mailog sa lain busa angay nilang ampingan.

“Huwag ninyong kalimutan na importante ang edukasyon, children study hard dahil ang natutunan ninyo inyo nang kayamanan yon”, ni Abellada pa. Si Abellada mapasalamaton sa San Miguel Foundation Inc. (SMFI) kinsa maoy ilang kauban sa proyekto ug sa Department of Education (DepEd) tungod sa suporta niini sa pagtukod sa usa ka building nga nahuman dayon sulod lang sa tulo ka buwan kapin human kini sugdi og panday niadtong Nobyembre sa miaging tuig.

Si Carmelle Buenaventura, executive director sa SMFI nagkanayon nga ang nahisgutang proyekto maoy ikatulo nga gipatuman dinhi sa Cebu ubos sa ilang partnership tali sa AGAPP.

Ang SMFI misaad nga mopatukod og 100 ka mga school building sa tibuok nasud.Gibutyag ni Buenaventura nga matag edipisyo mogasto sila P600 hangtod sa pagkatapos niini.

Kagahapon si Kongresista Eduardo Gullas sa unang distrito sa probinsiya sa Sugbo, Mayor Socrates Fernandez, Bise Mayor Alan Bucao ug ang ubang mga opisyal sa siyudad, DepEd Regional Director nga si Ricarido Borgonia ug Talisay City DepEd Superintendent Woodrow Denuyo mitambong usab sa maong kalihokan.

Si Gullas nga nahinabi sa mga tigbalita mapasalamaton sa AGAPP sa pagpili sa JES nga usa sa makabenipisyo sa proyekto nilang pagpatukod og mga school building alang sa mga kindergarten. Si Denuyo nga nahinabi usab sa mga tigbalita nagkanayon nga ang JES adunay 108 ka mga estudyante sa kindergarten ug may duha ka mga magtutudlo niini alang sa duha ka session nga klase.

Gawas sa gihatag sa AGAPP, ang JES adunay laing school building nga gigastohan sa DepEd ug gitakdang mahuman og panday niining tuiga. (BANAT NEWS)