Polis nga wa mo-blotter sa gi-turnover nga kwarta ipaimbestigar ni Digal

CEBU, Philippines - Gipaubos sa imbestigasyon ang usa ka polis sa syudad sa Danao human napakyas sa pagsuwat sa blotter sa gi-turnover nga kwarta sa usa ka ginang.

Matud pa sa hepe sa kapolisan sa lalawigan sa Sugbo, Sr. Supt. Erson Digal nga imbestigahon sa Provincial Intelligence and Management Branch si SPO3 Castor Laurel.

Kung tinuod man ang alegasyon, si Digal miingon nga kalapasan kini.

Usa ka Lilia Casas ang inahan sa gipasanginlang si Clint Casas nga mikuha og 6 mil US dolyares sa panimalay sa magtiayong Neil ug Marichu Muñoz.

Butyag usab ni Digal nga ila usab nga imbitahon si Lilia kini aron usab ilang mapangutana sa kamatuoran kun asa ang ubang kwarta.

Nasayran nga niadtong Nobiyembre 28, 2010 giingong gisulod ang panimalay sa magtiayon sa duha ka wala mailhing tawo ug gikuha niini ang 6 mil US dolyares.

Pipila ka adlaw ang milabay giingong ang kauban ni Clint Casas nga 15-anyos nasikop sa kapolisan ug kini maoy mitug-an nga ang iyang kauban sa pagpangawat mao si Clint Casas.

Nianang Disyembre 1 sa miaging tuig giingong ang inahan ni Clint Casas mi-turnover ngadto sa buhatan sa kapolisan sa kwarta nga nagkantidad og 300 US dolyares ug kini milakaw dayun.

Matud pa ni Digal nga ang pamilyang Muñoz mikwestyon nganong 300 US dolyares nalang ang nahibilin sa maong kwarta sulod lang sa tulo ka adlaw. Ang magtiayon midangop na sa Ombudsman aron ireklamo si Laurel. (BANAT NEWS)