CEBU, Philippines - Kritikal ang kondisyon sa usa ka 32-anyos nga lalaki human kini dunggaba sa wala hiilhing tawo didto sa barangay Tabunok, dakbayan sa Talisay kagahapon sa kaadlawon.
Ang biktima nailhan sa mga polis nga si Andrew Quilantang Borinaga, 32, lumad nga taga Midsayap North Cotabato.
Si PO2 Henry Mata sa Talisay City Police Station kinsa usa sa miresponde sa insidente mibutyag sa Banat News nga ang biktima nailhan nila pinaagi sa iyang driver’s license nga ilang nakuha gikan sa lawas niini.
Matud ni Mata nga si Quilantang nakaangkon og duha ka lawom nga samad dinunggaban sentro sa iyang dughan ug tulo ka samad dinunggaban sa walang bahin sa iyang bukton.
Si Mico Bacosmos, drayber sa usa ka traysikol kinsa nag-estambay sa lugar nga nahitaboan samtang nagpaabot og pasahero nakugang dihang si Quilantang miduol ngadto kaniya nga nagkadugo ug mihangyong magpahatod ngadto sa labing duol nga tambalanan.
Si Quilantang daling gidala ni Bacosmos ngadto sa Talisay City District Hospital (TCDH) apan tungod sa talandugong kahimtang niini gibalhin dayon kini ngadto sa Vicente Sotto Memorial Medical Center sa dakbayan sa Sugbo.
Ang gwardiya sa TCDH mao nay mi-report ngadto sa mga polis bahin sa hitabo.
Matud usab ni Mata nga si Quilantang giingong nakainom ug dili na motingog dihang ila kining naabtan didto sa TCDH.
Gituohan sa mga polis nga si Quilantang nagkalalis ug sa iyang kainom nga misangpot sa pagpanunggab .
Samtang ang laing anggulo nga gilantaw sa kapolisan mao kalagmitang gipareglahan lang ang biktima. (BANAT NEWS)