CEBU, Philippines - Usa ka konsehal sa lungsod sa San Fernando gikawatan og mga alahas ug salapi nga gibana-banang kapin sa tunga sa milyon ka pesos pinaagi sa usa ka menor de edad nga suspetsado kinsa nakasulod sa ilang balay sa barangay Pitalo sa maong lungsod sa miaging
Domingo sa kadlawon.
Apan nabawi sa mga polis ang ubang mga alahas ug salapi gikan sa suspetsadong menor de edad nga si Boy, (dili tinuod niyang ngalan).
Samtang ang biktima mao si Konsehal Santiago Charito Manlosa, nga taga barangay Pitalo. Ang suspetsado giingong milungkab sa pultahan sa master’s bedroom samtang si Manlosa ug ang asawa niini wala sa ilang balay niadtong higayona kay nanagkot didto sa Basilica.
Giingong gilungkab ni Boy samtang nahinanok ang mga tawo nga nahibilin sa balay.
Nadala sa suspetsado ang duha ka dagkung gold bracelet, tulo ka gold nga kwentas, duha ka gold nga sing-sing (daku ug gamay), usa ka parisan sa gold nga ariyos, $400.00 nga cash ug mga sensilyo nga giputos og plastic nga ang tanan gibana-banang mokapin sa P500,000.
Si PO1 Lauro Laurel sa San Fernando Police Station sa pakighinabi niini sa Banat News kagahapon nagkanayon nga sa ilang gihimong follow-up operation sa maong hitabo pinangulohan sa ilang hepe nga si Inspector Carlos Reyes ug PO3 Glen Burlas nabawi nila gikan sa suspek ang kapin sa $200 nga kwarta, mga sensilyo, upat ka gold nga kwentas, duha ka gold nga sing-sing ug usa ka parisan sa ariyos.
Ang nahisgutang suspek giingong nabantayan nga hubog ug nag-ihap-ihap og mga dolyares ug giingong mibangka pa kini og inom sa iyang mga barkada. (BANAT NEWS)