CEBU, Philippines - Dul-an sa 50 ka panimalay ang gibahaan sa barangay Poblacion Dos ug Tres sa dakbayan sa Carcar kagahapon sa buntag.
Gibasol dayon sa mga molupyo ang wala dayon pag-abli sa irigasyon diha sa ilang barangay maong milapaw ang tubig baha gikan sa bukid ug nakaingon sa pag-abot sa tubig sa kabalayan.
Matud pa nga nagkadaghan na ang pundo sa dam nga nahimutang sa maong dapit gumikan sa wala’y hunong nga pagbunok sa uwan.
Nagkanayon si SPO3 Rey Fuentes sa Carcar Police Station, nga ang maong mga barangay maoy naigo sa taas nga tubig nga gikan sa irrigation.
Matud pa ni Fuentes nga nalapawan pud sa tubig ang Nilla bridge hinungdan nga daghan nga mga motorista ang naglisod sa pag-agi sa maong dapit.
Sa report sa Balitang Bisdak kagahapon, mipadayag ang Philippine Atmospheric, Geophysical and Astronomical Services Association (PAG-ASA) nga moabot pa og usa ka semana nga pag-ulan ang Sugbo.
Kini tungod sa northwest monsoon ug cold front nga mihulma og bagang dag-om ug hangtud na sa grabeng pag-uwan.
Dugang pa sa PAG-ASA nga delikado gihapon nga mobiyahe ang mga gagmay nga sakayan sa kadagatan.
Gani pipila ka flight paingon sa Siargao ug Surigao ang gikanselar kagahapon gumikan sa dili maayo nga panahon.
Wala hinuon moreklamo ang mga pasahero gumikan kay nag-una kanunay ilang huna-huna sa ilang kaluwasan, (BANAT NEWS)