CEBU, Philippines - Si Cebu Archbishop Jose Palma mopahigayon karon sa labing una niyang Santos nga Misa Pontifical isip bag-ong Arsobispo sa Sugbu karong hapon sa Basilica Minore del Sto. Niño.
Gawas pa niini, si Palma usab ang mangunay paghatud sa imahe sa Balaang Bata gikan sa Basilica ngadto sa karo nga maoy sakyan niini paglibot uban sa solemn foot procession sa ala-1:30 sa hapon.
Sa iyang pamahayag sa TV Patrol Central Visayas, ang secretary ni Palma nga si Msgr. Ildebrando Leyson nagkanayon nga mao kini ang labing unang aktibidad sa simbahan nga pangulohan ni Palma kinsa opisyal na nga giinstalar nga Arsobispo sa Sugbu hulip ni Arsobispo Ricardo Cardinal Vidal niadtong Huwebes.
Hinuon, si Leyson nagkanayon nga walay seguro nga mouban si Palma sa foot procession tungod kay bag-o lang kini nga miabot dinhi sa Sugbu niadtong Miyerkules ug daghan pang ubang gimbuhaton.
Gidugang usab ni Leyson nga pipila ka meeting nga may kalambigitan sa simbahan ang gitambungan ni Palma kagahapon.
Gawas sa pontifical mass karong adlawa, si Palma usab ang mopahigayon sa solemn pontifical mass ugma sa buntag diha gihapon sa Basilica. (BANAT NEWS)