CEBU, Philippines - Aron sa pagsiguro nga dili makainom og hugaw nga tubig ang mga molupyo sa dakbayan sa Talisay ang kagamhanan sa siyudad mopahigayon og inspeksiyon sa tanang mga tinubdan sa tubig.
Ang konseho sa Talisay atol sa ilang regular session niadtong Martes mipasar sa resolusyon alang sa maong tumong.
Ang Talisay City Health Office maoy gitahasan nga mopahigayon og inspeksiyon sa labing daling panahon ngadto sa mga tinubdan sa tubig sa siyudad nga gigamit nga ilimnon sa mga residente pagsiguro nga dili kini delikado sa ilang panglawas.
Si Konsehal Choy Aznar kinsa maoy nangamahan sa nahisgutang resolusyon nagkanayon nga aron malikayan ang mga sakit sama sa kalibanga ug tipos gumikan sa tubig nga giinom, hinungdan nga mogama sila og lakang.
Ang mga sakop sa konseho nabalaka nga ang nahitabo didto sa lungsod sa Alegria diin daghang nasugamak sa tipos ug sa dakbayan sa Danao diin giatake usab sa kalibanga, paningkamotan sa mga opisyal sa Talisay nga kapangandaman kini.
Si Konsehal Eduardo Gullas III usa sa mipaluyo sa nahisgutang resolusyon ni Aznar.
Hinuon ang mga sakop sa konseho walay nadawat nga report nga adunay nataptan og tipos o ba kaha nagsuka kalibang sa Talisay tungod sa giinom niining tubig. (BANAT NEWS)