CEBU, Philippines - Patay ang usa ka ginang ug laing tulo ang naangol dihang misaliring ang motorsiklo nga ilang gisakyan kay nakadasmag og bata didto sa sityo Tal-ot barangay Valencia lungsod sa Carcar sa miaging hapon.
Ang namatay mao si Wilfreda Cabungcal, 56, minyo, samtang ang mga naangol mao sila si Junmark Genelaso, 8, usa ka ginganlan og Rotchel lakip na ang drayber sa motorsiklo nga si Glecerio Abatayo, 48, pulos molupyo sa nahisgutang lugar.
Sa imbestigasyon nga gihimo sa kapolisan sa Carcar nasayran nga si Cabungcal ug Rotchel nagsakay sa motorsiklo nga gimaneho ni Abatayo gikan sa barangay Lupa dihang pag-abot sa highway sa Tal-ot , ang bata nga si Genelaso , kalit nga milabang sa karsada.
Nadasmagan ang bata samtang ang motorsiklo ni misaliring ug si Cabungcal ug Rotchel nangalagpot ug mitugpa sa sementadong karsada uban usab sa drayber nga si Abatayo
Dihadiha gihatod dayon si Cabungcal ug si Rotchel ngadto Carcar Emergency Hospital apan wala madugay namatay si Cabungcal.
Gituohan sa mga doctor nga napantok ang ulo ni Cabungcal sa sementadong karsada nga maoy hinungdan sa kamatayon niini.
Padayong giatiman sa tambalanan sila si Rotchel, Abatayo ug Genelaso.
Sa pakighinabi sa Banat News kang SPO1 Joseph Quimod sa Carcar Police Station nasayran nga mopasaka og kaso ang bana ni Cabungcal batok kang Abatayo, samtang ang naulahi anaa na sa prisohan sa kapolisan sa Carcar. (BANAT NEWS)