Notadong drug pusher sa Danao tiklo

CEBU, Philippines - Duha ka adlaw human ang notadong drug pusher sa dakbayan sa Danao gironda sa mga sakop sa Provincial Anti-Illegal Drugs Special Operation Task Group (Paidsotg), laing notadong drug pusher na usab ang gironda sa kapolisan ug nakuhaan og ubay-ubay nga pakete sa gidudahang shabu niadtong Miyerkules sa gabii diha sa sitio Mahayahay    sa barangay Maslog sa mao gihapong    dakbayan.

Ang suspetsado mao si Alvin Labrador, 43, kinsa nasakmitan og mga paketeng    gidudahang shabu nga nagkantidad og P30 mil. Laing ebidensya nga nakuha sa panimay sa suspetsado mao ang mga ginagmay’ng pakete sa shabu nga tag P20, tag P50, ug tag P500 ug mga kahimanan sa paghigop sa aso sa shabu.

Si SPO1 Allan Muñoz mitug-an nga si Labrador usa sa notado na kaayong maligyaay og ginadiling drugas sa ilang lugar ug anaa sa ilang listahan isip level 2. Si Labrador gitanggong na sa Danao detention cell samtang gipaabot nga pasakaan siya sa kapulisan sa kasong kalapasan sa Section 11 sa Republic Act 9165.

 Niadtong Lunes unang gironda sa mga sakop sa Paidsotg nga pinangulohan ni Supt. Teofilo Seclot, Deputy Provincial Director for Operation (DPDO) ang panimay ni Florita Peñas ang giingong drug queen sa barangay Sabang, sa maong dakbayan. (BANAT NEWS)