CEBU, Philippines - Usa ka sakop sa media ug dakong opisyal sa Alliance of Nationalism and Democracy (ANAD) Partylist mipasidaan sa publiko batok sa mga local nga mangingilad kinsa usa siya sa gibiktima niini.
Si Engr. Greg Senining, chief of staff sa ANAD Partylist mihingalan sa usa sa maong mga mangingilad nga giila sa ngalang Dondon Ysulan, hingkod, nga taga barangay Tamiyao, lungsod sa Bantayan, isla sa Bantayan.
Si Senining kinsa usab maoy nagdala sa programa nga Tingog sa Lungsod sa DYRB mibutyag sa Banat News nga dili lamang pangilad ang gihimo ni Ysulan kaniya kundi gikawatan pa gyud siya niini og usa ka car stereo nga balor og P25 mil.
Si Senining kinsa usa ka sakop sa media isip blocktimer sa radio mitug-an nga si Ysulan sa sayo pa nagpaila kaniya nga usa ka electronic technician ug mekaniko gawas nga nagpaila kini kaniya nga usa sa iyang tigpaminawan sa iyang programa sa radio.
Miingon si Senining nga nailhan niya si Ysulan niadtong ikaduhang semana sa Agosto 2010, sa kagabhion, dihang napagngan og headlight ang iyang sakyanan duol sa usa ka gasoline station sa north reclamtion area ning dakbayan sa Sugbo.
Si Ysulan kinsa may kaubang amigo niya niadtong higayona, mitanyag nga siyay moayo sa headlight sa sakyanan ni Senining ug nalipay kaayo ang naulahi dihang naayo ang iyang suga.
Kumo kay misalig siya nga may kaantigohan si Ysulan, iya usab kining gihangyo nga ipaayo ang iyang car stereo, busa niadtong Agosto 29, 2010 dihang mihangyo si Ysulan nga iyang dad-on sa iyang repair shop nga nahimutang kuno sa lungsod sa Consolacion ang maong stereo nga balor og P25 mil, wala magdumili ang chief of staff sa ANAD.
Apan gikan niadtong higayona, si Senining mitug-an nga gisaad-saaran nalang siya ni Ysulan nga ihatod ang iyang stereo inig-kaayo, apan natapos nalang ang buwan sa Oktobre, Nobyembre, Decembre, 2010 hangtod sa pagsuwat ning maong balita wala na gyud mopatim-aw si Ysulan kaniya.
Midugang si Senining nga niadtong bag-ohay pang gidala ni Ysulan ang iyang stereo, makontak pa niya kini sa cell phone niini nga numero 09993701328, apan sa kadugayan dili na kini motubag kaniya.
Mao nalay pagkakurat ni Senining, dihang iyang gipasusi kang Winnie Gulani, usa ka ANAD coordinator nga nagbase sa norte nga usa diay kuno ka ‘notorious’ nga mangingilad si Ysulan kay matud pa daghan na kunong mga nabiktima niining tawhana didto sa Tamiyao busa milayas kini ug wala na mopatim-aw sa ilang lugar kay daghan kuno ang nagdumot niini gumikan sa iyang modus operandi nga kutob sa ipaayo niyang mga butang dili na iuli ngadto sa tag-iya.
Busa midangop si Senining sa iyang abogado ug gitambagan siya niini nga kinahanglang masayran sa publiko pinaagi sa radio ug sa pamantalaan ang bisyo ni Ysulan aron dili na kini makapamiktima pa og laing tawo.
Si Senining miangkon nga bisan siya nailad ug nabiktima sa pagpangawat ni Ysulan apan wala niya kini igsapayan ug ikauwaw kay alang kaniya ang mahinungdanon nga wala nay inosenteng tawo nga mabiktima pa ni Ysulan. (BANAT NEWS)