CEBU, Philippines - Duha ka tawo ang naangol sa pagpanunggab dihang ang nakadunggab sa amahan giluba usab sa anak sa maong biktima didto sa Sitio Little Plaza sa Barangay Inayawan, ning dakbayan sa Sugbo sa miaging gabii.
Ang mga biktima mao sila si Macario Cantancio y Proveda, 42, minyo nga taga Inayawan,ug si Romnick Plaza Abenoja, 21 nga silingan ra usab ni Proveda.
Ang suspetsadong miluba kang Proveda, mao si Abenoja, samtang ang midunggab kang Abenoja mao ra usab ang anak ni Proveda nga si Dave Cantancio y Laparan, 21.
Si Proveda nataroyan sa kutsilyo ni Abenoja sa buko-buko, samtang si Abenoja natusak usab sa kutsilyo ni Laparan sa buko-buko gihapon.
Ang duha ka mga biktima daling gihatod ngadto sa Cebu City Medical Center , samtang si Laparan gitanggong usab dayon sa prisohan.
Sa pakighinabi sa Banat News ni PO2 Judan Batucan, nasayran nga karaang panagdumot ang hinungdan nganong giluba ni Abenoja si Proveda. - Ug Rey Pasaporte (BANAT NEWS)