Muslim community mokooperar

CEBU, Philippines - Gipahibalo sa spokesperson sa United Muslim Federation of Cebu nga si Najeeb Andang nga motambayayong sila sa kapulisan ug sa kagamhanan sa siyudad sa Sugbo sa pag-monitor sa kahusay ug kalinaw sa umaabot nga Sinulog 2011 karong Enero 16.

Sumala pa ni Andang nga gatosan nila ka mga sakop ang mobulantaryo nga mobantay sa kadalanan ug motabang sila og report ngadto sa kapulisan kung dunay mga dautang panghitabo.

Dugang pa niya nga gusto nila nga ipakita nga nagkahiusa gyud ang Muslim dinhi sa Sugbu sa pagtabang sa nagkadaiyang kalihukan dinhi. “Kinahanglan gyud nga mokooperar kita sa kapulisan ug sa City Government . Ang Muslim community sa Cebu mohatag gyud og lig-on nga suporta kanila,” nagkanayon si Andang.

Gipaniguro ni Andang nga dili masudlan og Abu Sayyaf ang Sugbo   ug sila gyud mismo ang motaho sa kapulisan kung dunay sila’y mabantayan nga mga dautang elemento.

Samtang mapasalamaton si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO)       ngadto sa Cebu Muslim Community gumikan sa kooperasyon niini kanila. Nagkanayon si Santander nga sunod-sunod nga mga tigom ang himuon nila sa Muslim community aron mapalig-on gyud ang seguridad.

Si Mayor Michael Rama mipasalig sa iyang hugot nga suporta sa Cebu Muslim Community ug iyang gihangop ang programa niini nga mobutang og Muslim volunteers atol sa Sinulog.

Nagkanayon ang mayor nga ang maong pamaagi mihaom sa prinsipyo sa iyang administrasyon nga mao ang pagpatigbabaw sa “bolunterismo” ug “Bayanihan.” - BANAT NEWS