CEBU, Philippines - Naangol ang usa ka tawo nga nagsakay sa iyang bisiklita dihang nadasmagan kini sa naghaguros nga motorsiklo didto sa dalan Plaridel, barangay Cambaro, dakbayan sa Mandaue kagahapon sa alas 9:00 sa buntag.
Ang biktima mao si Joselito Flores, 43 , minyo nga taga barangay Looc, dakbayan sa Mandaue ug ang motorsiklo nga nakadasmag kaniya gimaneho usab ni Ydon Costas, 19, kinsa lumad nga taga Mindanao ug kasamtangang nagpuyo sa barangay Alang-Alang sa maong dakbayan.
Sa nasayran sa imbestigasyon ni PO3 Joselito Fuentes sa traffic division sa kapolisan sa maong dakbayan nga paingon sa reclamation area ang motorsiklo nga gimaneho ni Costas ug kalit lang nadasmagan niini si Flores pag-abot niya sa maong dapit.
Ang biktima kansang lawas nabalibali daling gidala sa tambalanan sa Mandaue City District Hospital ug human sa pasiunang pagtambal dali usab kining gibalhin sa tambalanan sa dakbayan sa Sugbo.
Matud pa ni Fuentes nga si Costas nga nakabaton usab og mga pangus sa iyang kalawasan gipatambalan usab ug pagkahuman mitahan kini sa kapolisan ug gibalhog sa bilanggoan. - BANAT NEWS