Arsobispo Palma moabot na ugma

CEBU, Philippines - Gikatakdang moabot na ugmang adlawa ang bag-ong gitudlong Arsobispo sa Archdiocese sa Sugbu nga si Archbishop Jose Palma alang sa nagsingabot niining instalasyon karong Huwebes diha sa Cebu Metropolitan Cathedral.

Ang 60-anyos nga lumad nga taga Dingle, Ilo-ilo City, maoy mamahimong ikaupat nga Arsobispo sa Sugbu, hulip sa posisyon nga biyaan ni outgoing Archbishop Ricardo Cardinal.

Si Ben Chua, sakop sa ad hoc committee on canonization and installation, nagkanayon nga libuan ka mga bisita ang motambong sa maong seremonyas nga sugdan sa alas-9 sa buntag sa cathedral.

Kini naglakip sa 700 ka mga kaparian gikan sa Archdiocese sa Sugbu ug laing kapin ka 70 ka mga obispo.

Motambong usab ang mga paryente ni Palma ug mga pari gikan sa Archdiocese sa Palo, Leyte.

Sa laing bahin, human sa dul-an 30 ka tuig niya nga pagpuyo, pormal na nga nanamilit si Vidal sa iyang mga kaubanan sa Archbishop’s Palace diha sa D.Jakosalem St. Cebu City niadtong Domingo, apan kini miingon nga pabilin gihapon kini nga motambong sa iyang opisina kutob sa Huwebes.

Si Vidal mibalhin pagpuyo didto sa iyang retirement house nga nahimutang sa Sto. Niño Village sa Banilad, ning syudad.

Gidugang usab ni Chua, nga human sa installation, usa ka salo-salo ang ipahigayun sa Archdiocese sa Sugbu didto sa Cebu International Convention Center (CICC).

Ang Catholic Bishops' Conference of the Philippines (CBCP) sa ilang website nagkanayon nga si Palma maoy ika- 24th prelature nga mangulo sa probinsya sa Sugbu sugod niadtong August 30, 1595 dihang si Augustinian Friar Pedro de Agurto natudlong labing unang Obispo sa artsidiyosisi.

Sumala pa usab sa CBCP lakip sa posibleng motambong sila si Auxiliary Bishops Julito Cortes ug Emilio Bataclan, Manila Archbishop Gaudencio Cardinal Rosales ug Papal Nuncio Archbishop Edward Joseph Adams.

Magsilbing ‘homecoming’ alang kang Palma ang pagbalik niini dinhi sa Sugbu sanglit natudlo siya kaniadto dinhi nga Auxiliary Bishop of Cebu niadtong Nobiyembre 28, 1997.

Si Palma gipanganak Marso 19, 1950 sa Dingle, Iloilo ug naordinahan pagkapari niadtong Agusto 21, 1976. Ang iyang Episcopal ordination gihimo niadtong Enero 13, 1998.

Enero 13, 1999, natudlo siyang Obispo sa Calbayog ug nainstalar niadtong Marso 9, 1999.

Isip arsobispo sa Calbayog, si Palma maoy usa sa misaway sa mga gialegar nga human rights violations sa kasundaluhan ilawom sa pamunoan kaniadto ni kanhi Maj. General Jovito Palparan Jr.

Natudlo siyang arsobispo sa Palo niadtong Marso 19, 2006 ug nainstalar Mayo 2, 2006. Niadtong Hulyo 11, 2009, natudlo siyang bise presidente sa CBCP.   (BANAT NEWS)