Taxi di pa kapaumento sa plite

CEBU, Philippines - Gipahimangno sa buhatan sa Land Transportation Franchising and Regulatory Board (LTFRB) 7 ang publiko nga ang mga taksi drayber dili pa makakolekta og usbaw sa ilang plitehan hangtod nga dili mahingpit ang mga rekisito nga gikinahanglan nga gipatuman sa ilang buhatan.

Si Ahmed Cuizon nga maoy bag-ong miasumer nga LTFRB 7 regional director nga nahinabi sa mga tigbalita mipadayag nga kinahanglan mobayad og filing fee ngadto sa ilang buhatan ang mga drayber.

Kinahanglan usab nga ma-calibrate ang ilang metrohan sa accredited nga kompanya.

Dugang pa niya nga gikinahanglan usab nga mohatag og resibo ang drayber sa ilang pasahero ug dili mahimong makapangayo sa bag-ong rate ang drayber kun wala siya’y metrohan nga maka-isyu og resibo, sa laktod gidili ang ‘mano-mano.’

Si Cuizon miingon nga ang mga drayber nga mag-una sa pagkolekta sa usbaw sa plitehan mahimong dakpon kun may moreklamo.

Sa nasayran nga ang LTFRB Central Office mihatag na og pagtugot sa pagpausbaw sa plitehan sa taxi gikan sa unang pagsakay sa pasahero sa kantidad nga P30 ngadto na sa P40 ug gikan sa P2.50 alang sa matag 300 metros himuon na kining P3.50 sugod sa Enero 15, 2011. (BANAT)