Tungod sa pagpamomba sa Jolo, Sulu PRO-7 gialerto

CEBU, Philippines - Ang pangulo sa kapulisan sa rehiyon siyete nga si Chief Supt. Ager Ontog mimando ngadto sa tanang city ug provincial police directors nga bantayan ang mga vital installations, pantalan, airports, simbahan, mga dagkong department stores ug uban pang lugar diin sagad magtapok ang daghang mga tawo sa dili pa ang adlaw ug atol na gyud sa pagsugat sa Bag-ong Tuig.

Giluwatan niini ang maong kamanduan ni Ontog tungod sa nahitabong pagpamomba sa simbahan didto sa Jolo Sulu niadtong Domingo diin miangol sa pipila ka mga kinabuhi.

Gidudahan sa kapulisan nga binuhatan sa mga sakop sa Abu Sayyaf Group (ASG) ang maong pagpamomba niadtong Domingo.

Matud pa ni Ontog nga pahugtan nila pag-ayo ang police visibility sa tanang lugar nga daghan ang mga tawo ingon man ipatuman usab nila ang subsob nga checkpoints sa kalungsoran ug siyudad sa tibuok rehiyon siyete aron masigurong walay makalusot nga mga dautang elemento nga nagplanong momugna og kagubot.

Tungod niini ilaha usab gipalapdan ang intelligence community pagpaniid niadtong mga tawong kadudahan ang linihokan ingon man ang ilahang pakig-alayon ngadto sa opisyales sa matag barangay kinsa maoy may dakong papel sa ilang tagsa-tagsa ka barangay.

Si Ontog subling nanawagan sa katawhan nga moabag kanila kung duna man gani silay mamatikdan, kinahanglan ipahibawo gilayon sa pinakaduol nga police station aron ilaha dayon kining maaksyonan.

Gawas niini makig-alayon usab ang PNP sa ubang ahensya sa gobiyerno, mga magpapatigayon ug sa kadagkuan sa Muslim community dinhi sa Sugbu.

Matud ni Ontog nga ang ilang pagpatuman sa hugot nga seguridad sa tibuok rehiyon siyete ilabina dinhi sa dakbayan hangtud na kini sa bulan sa Enero sanglit dunay dakong kalihokan nga mao ang Sinulog Mardi Gras. - BANAT NEWS