CEBU, Philippines - Kasong murder maoy ipasaka sa kapolisan batok sa duha ka mananagat nga suspetsado sa pagpatay sa usa ka miyembro sa Marine Watch sa lungsod sa Cordova.
Ang duha ka mga suspetsado nga sila si Luis Fernandez ug Dongcoy Yongco nga nagtago-tago sulod sa pipila ka adlaw apan mitahan ngadto kang barangay Kapitan Doroteo Emit sa barangay Pooc, dakbayan sa Talisay sa miaging adlaw.
Si Senior Inspector Felix Pacaldo, hepe sa kapolisan sa maong lungsod mibutyag sa Banat News nga ilang gipaabot ang resulta sa autopsy sa patay’ng lawas ni Rodrigo Sultan aron pagsuta sa hinungdan sa kamatayon niini.
Kini bisan pa kun nalubong na kagahapon ang patay’ng lawas ni Sultan, ang giingong gipatay sa mga suspetsado.
Gitataw ni Pacaldo nga padayon na nilang giandam ang mga dokumento alang sa pagpasaka og kaso sa duha ka mga suspetsado sa kamatayon ni Sultan uban sa resulta sa outopsy sa patay’ng lawas niini.
Miangkon ang duha ka suspek nga didto sila mopaingon sa lungsod sa Barili human sa ilang pagdunggo sa baybayon sa barangay Pooc niadtong kaadlawon sa Disyembre 20, human mawagtang si Sultan.
Ang duha nga nahinabi sa mga tigbalita hugtanong mihimakak sa pasangil nga ilang gipatay si Sultan.
Giligar ni Yongco nga gitionan kuno sila ni Sultan og pistola busa naglinayugay sila hangtod nga ilang nailog ang armas niini apan nawad-an sa panimbang sa lawas si Sultan ug nahagbong kini sa dagat.
Pagdunggo nila sa baybay, ilang gitahan ang armas nga .45 kalibreng pistola ngadto sa tanod sa Pooc.
Si Yongco ug Fernandez human sa ilang pagtahan kang kapitan Emit sa barangay Pooc sa dakbayan sa Talisay dali usab kining gipaatubang ngadto kang Gobernador Gwendolyn Garcia kinsa didto na sa Mactan Cebu International Airport alang sa iyang biyahe ngadto sa gawas sa nasud. (BANAT NEWS)