CEBU, Philippines - Padayong gisuhid sa mga otoridad ang kadagatan sa Sugbo aron pagpangita sa nahanaw nga sakop sa Marine Watch sa lungsod sa Cordova nga gituohang gitambog sa dagat sa duha ka mga dinakpang mananagat nga taga barangay Pook, sa dakbayan sa Talisay.
Si Senior Inspector Felix Pacaldo, hepe sa kapolisan sa Cordova nga nahinabi sa Banat News mibutyag nga tulo ka mga pump boat ang ilang gigamit sa pagsudlay sa kadagatan ning lalawigan.
Ang tulo ka mga pump boat giluwanan sa mga kaubanang Marine Watch ug kapolisan sa Cordova sa pamasin nga mapalgan ang nawagtang nga si Rodrigo “Rudy” Sultan nga gituohang gipatay ug gitambog sa dagat sa duha ka dinakpan nga sila si Dongcoy Yongco ug Luis Fernandez `kinsa pulos usab nga nakasibat.
Hinuon ang laing duha ka mananagat nga nadakpan nga sila si Noe Lastimada ug Ruben Beyaya gipagawas na gikan sa detention cell kagahapon sa buntag human sila makabutang og piyansa sa korte.
Si Senior Inspector Pacaldo mipasabot nga ilang gipuntariya ang kadagatan sa dakbayan sa Talisay, Naga, Minglanilla, Carcar ug uban pa nga mga dapit dinhi sa Sugbo.
Dugang pa niya nga mibisita kagahapon sa iyang buhatan si Barangay Kapitan Doroteo Emit sa barangay Pooc, dakbayan sa Talisay kinsa mipahibawo nga boluntaryo kining motabang sa pagpangita kang Sultan , ingon man sa duha ka mga suspetsado nga mipatay niini kinsa pulos usab taga Talisay.
Gipasabot niya nga dili pa sila hingpit nga makapasaka og kaso batok sa duha ka mananagat sanglit gipaabot pa nila nga mabangalan ang nahanaw nga si Sultan sa pagsiguro kun gipatay ba ang biktima.
Gitataw ni Pacaldo nga ang iyang mga sakop tua mopunting pagpangita kang Sultan sa habagatang bahin sa kadagatan sa lalawigan sa Sugbo sanglit kusog man ang sulog sa dagat paingon ngadto sa maong dapit niining panahona.
Matud pa niya nga wala pa sila mangayo og ayuda sa mga sakop sa Philippine Coast Guard sanglit mahimo pa man nila kini sa hinayhinay nga paagi. Si Pacaldo miingon nga si Mayor Adelino Sitoy sa maong lungsod maoy nag-abaga sa mga galastohan alang sa pagpangita sama sa gitubil nga krudo sa tulo ka mga pump boat nga gigamit pagpangita kang Sultan. (BANAT)