CEBU, Philippines - Usa ka magtutudlo sa tunghaan sa kagamhanan kinsa giakusahang nanagmal sa iyang estudyante gisikop sa kapolisan didto sa barangay Poblacion, lungsod sa Oslob, sa miaging hapon.
Ang maong magtutudlo giila nga si Eutiquio A. Lumondoc, 53, minyo, nga nagtudlo sa Hagdan Primary School, sa barangay Hagdan, sa nahisgutang lungsod.
Ang pagdakop kang Lumondoc, gipasikad sa warrant of arrest nga giluwatan ni Judge Ramon Himalaloan, Regional Trial Branch 62 sa lungsod sa Oslob.
Ang kaso ni Lumondoc, nanukad dihang giakusahan siyang midagmal sa iyang estudyante niadtong 2007.
Sa pakighinabi sa Banat News kang SPO3 Nelson Sequibal sa Oslob Police Station nasayran nga si Lumondoc may lain pang giatubang nga kaso bahin gihapon sa pagpanagmal niya og estudyante.
Hinuon gibuhian lang usab dayon sa kapolisan si Lumondoc, human kini mobayad og piyansa nga bali og P80 mil. (BANAT NEWS)