CEBU, Philippines - Gipanghatag na kagahapong adlawa ang bonus sa mga sakop sa Philippine National Police (PNP) lukop nasud sumala pa ni PRO-7 Chief Supt. Ager Ontog kagahapon.
Tungod niini daghang mga pulis ang nangalipay human sila masayod nga madawat na nila ang bonus nga P10 mil diin ang P3 mil niini gikan sa panudlanan sa PNP.
Apan ang uban wala na malipay bisan gamay sanglit tungod sa ilang kakabus ug panginahanglan hagbay na nila kining gibaligya sa mga tigpautang.
Kung dunay mga polis nga miangkong nahalin na ang ilang mga bonus duna say uban nga gisekreto sa ilang mga asawa ang maong pahalipay sanglit pipila ka mga asawa sa mga polis ang nakit-ang nagpunay og apong diha sa kampo ug nagpakisayod niini.
Nasuta sa Banat News dihang gipangutana ang pipila kanila, sila mibutyag nga wala sila tug-ani sa ilang mga banang polis kun kanus-a gyud ang ilang bonus moabot samtang ang uban miingon nga kaniadto wala gyud sila tug-ani maong karon palang ilaha nang pangunayan ang pagsusi niini.
Si Ontog nagkanayon nga kadtong makadawat niini aduna na unyay saluhan atol sa Noche Buena.
Nanghinaot siyang iintriga gyud sa iyang mga sakop sa ilang pamilya ang bonus aron magmalipayon ang ilang Pasko. (BANAT NEWS)