Rama misuporta ni Gwen

CEBU, Philippines - Gipasalig ni Mayor Michael Rama sa dakbayan sa Sugbo nga andam siya makig-alayon sa Kapitolyo sa kampanya batok sa illegal nga panagat sa tibuok lalawigan sa Sugbo.

Kini maoy gipadayag sa mayor kagahapon kalabot sa report nga migawas dinhi sa Banat News nga gihagit siya ni Gobernador Gwendolyn Garcia nga moabag sa kampanya batok sa illegal nga panagat.

Matud pa ni Rama nga iya na nga gipasidan-an ang iyang Bantay Dagat Task Force nga gipangulohan ni Cesar Enriquez nga mohimo og higpit nga pagbantay sa kadagatan aron hingpit nga masikop ang mga tawo nga misulod sa dautang pamaagi sa ilang pagpanguha og isda.

Samtang ang hepe sa Veterinary Medicine and Fisheries (DVMF) nga si Alice Utlang mipasalig nga andam motambayayong ang iyang departamento sa nahisgutang kampanya bisan dili kini direkta nga nahilakip sa operasyon sa kadagatan.

Dugang pa ni Utlang nga aduna siya’y mga tawo nga kanunay’ng mo-inspeksyon sa mga namaligya og isda sa kamerkadohan ug dinhi masuta kun gipaagi ba kini sa hustong proseso sa pagpanguha niini.

Gitataw ni Utlang nga walay dautang epekto ngadto sa panglawas sa mga tawo ang mga isda nga nakuha pinaagi sa dinamita apan makahatag kini og dakong problema   sa kalikopan.

“Kinahanglan gyud nga magtinabangay ang mga LGU sa paggukod sa mga tawo nga mosulod sa illegal nga panagat. Importante kaayo nga ma-edukar og maayo ang mga mangingisda sa maong butang,” panapos pa ni Utlang. (BANAT NEWS)