CEBU, Philippines - Patay ang usa ka 53-anyos nga lalaki human kini pusila sa wala mailhing kriminal dihang ang biktima paingon nang mouli gikan nga nagbilar sa silingan niadtong Biyernes sa gabii sa sitio Riles, barangay Poblacion I, dakbayan sa Carcar.
Ang biktima giila sa mga polis nga si Wilfredo Baring, minyo, residente sa nahisgutang lugar kinsa nakaangkon og samad pinusilan sa walang bahin sa lawas ug tiil daling gidala ngadto sa Carcar District Hospital apan pila ka minuto nakabsan gyud kini sa kinabuhi diha sa maong tambalanan.
Si SPO2 Jorame Tanudtanud nga nahinabi sa Banat News nagkanayon nga naglakaw ang biktima paingon nang mopauli gikan nga nagbilar diha sa ilang silingan dihang duol na kini sa ilang balay kalit lang nga mitungha ang usa ka wala mailhing lalaki ug dayon mipusil sa biktima.
Matud ni Tanudtanud nga nagpahigayon pa sila og follow-up nga imbestigasyon sa insidente kung unsay motibo pagpamusil ug aron mailhan ang kriminal kinsa daling miikyas human niini og pamusil. (BANAT NEWS)