CEBU, Philippines - Gipakatap sugod kaganihang kaadlawon ang 60 ka personnel gikan sa onse ka police station dinhi sa dakbayan atol sa pagbukas sa Misa de Gallo.
Si Chief Insp. Romeo Santander, hepe sa City Intelligence Branch (CIB) sa Cebu City Police Office mitug-an sa mga tigbalita nga gawas sa 60 ka polis aduna say mag-roving sa palibot.
Ang kapolisan mosusi usab sa estambayan sa mga batan-ong sakop sa street gangs o pundokanan sa mga tawong mag-inom.
Matud ni Santander upat ka personnel sa matag simbahan ang ilahang pabantayon ug makig-alayon usab ang mga hepe sa police station ngadto sa Parish Security Group (PSG) ingon man opisyales sa barangay. Iyang giawhag ang publiko nga mosimba sa Misa de Gallo nga dili magdala og mahalon nga butang ug dili usab nila biyaan ang ilang panimalay nga walay mahabilin o kaha sirad-an gyud pagsiguro basin unya og pahimuslan sab sa mga kawatan ang kahigayonan.
Matud ni Santander nga usa sa ilang hatagan og pagtagad mao si Arsobispo Cardinal Vidal nga mopahigayon sa Misa de Gallo dinhi sa dakbayan. Sa pikas bahin, susama usab ang himuon sa kapulisan sa probinsya atol sa pagbukas sa Misa de Gallo. Ang kapulisan sa dakbayan ug probinsya gipaubos sa red alert status.
Si Sr. Supt. Erson Digal mimandu kagahapon sa buntag sa iyang mga hepe sa kalungsoran ug siyudad nga kinahanglan mopakatap og personnel sa simbahan aron mamentinar ang kahusay ug kalinaw. Gawas pa niini, gimanduan usab ang mga hepe sa Danao, Naga ug Minglanilla nga hugtan maayo ang seguridad sanglit si Vidal mopahigayon man sa Misa de Gallo sa maong mga lungsod.
Giklaro niini nga dili sila magbutang og police assistance center duol sa simbahan sa matag kalungsoran ug siyudad ug paigo na ang police visibility. - Rey Pasaporte ug Maricel Regasajo (BANAT NEWS)