CEBU, Philippines - Gikalipay ni Gov. Gwen Garcia ang desisyon sa mga residente atol sa gipahigayon nga public hearing sa barangay Tinaan, Naga kalabot sa plano sa Kapitolyo sa pag-ugmad sa Balili Property sa miaging adlaw.
Matud pa sa gobernador nga ang suporta sa katawhan sa Naga sa maong laraw maghatag og kahayag alang sa katumanan sa plano sa kagamhanan sa lalawigan nga matukod ang usa ka moderno nga international port sa maong dakbayan.
Nagtuo ang gobernador nga ang suporta sa mga katawhan sa Tinaan, naghatag kaniya og dakong paglaum nga makakuha siya og development permit gikan sa barangay ug sa dakbayan sa Naga.
Sa higayon nga makakuha og development permit ang Kapitolyo ikapadayon na niini ang plano tungod kay ang Department of Environment and Natural Resources (DENR) moluwat man usab og Environmental Compliance Certificate ( ECC).
Atol sa gipahigayon nga public hearing didto sa Cepoc Elementary School sa Tinaan, nasuta nga walay bisan usa nga misupak sa plano nga economic zone development sa Balili property.
Kini tungod kay nakita sa katawhan sa Tinaan ang kadako sa kaayohan ug kalambuan sa ilang barangay kay sila ra man ang makapahimulos niini sa higayon nga magsugod na ang maong proyekto.
Samtang si Naga Mayor Valdemar Chiong mibutyag nga dayag gayud kaayo ang desisyon sa katawhan sa Naga sa pag-uyon sa kaugmaran sa Balili property.
Gani gipasabot ni Mayor Chiong nga dili gayud maapektohan ang mga mananagat sa proyekto sa yuta sa mga Balili gumikan kay gisunod gayud sa lalawigan ang mga lagda sa DENR alang niini. – BANAT NEWS